Finansije i Osiguranje - Makedonija

Дигитализацијата на платежните услуги продолжува и во третиот квартал од 2022

И во третиот квартал на 2022 година граѓаните сè повеќе ги користат платежните картички од домашните издавачи за плаќање во трговијата во земјата, што доведе до годишен раст кај вредноста и кај бројот на остварените трансакции од 14,9 и 8,5 %, соодветно. Годишниот раст на бројот на плаќањата во трговијата, кој произлегува, пред сè, од повисокиот годишен раст на бројот на плаќањата со платежни картички на виртуелните (интернет) места на продажба (10,1 %), иако послаб, продолжува и во третиот квартал од 2022 година, а продолжува и годишниот раст на бројот на плаќањата на физичките места на продажба (8,3 %).

Кај плаќањата на граѓаните со кредитни трансфери во истиот период забележан е годишен пад на бројот на плаќања за 8,6 % при раст на вредноста од 5,6 %. Притоа, постепената промена на навиките на граѓаните при вршење на плаќањата во земјата со цел користење на придобивките од електронското банкарство е видлива во начинот на вршење на кредитните трансфери, па така во третиот квартал од 2022 година забележан е годишен раст од 5,2 % кај бројот на плаќањата извршени електронски, односно годишен пад на бројот на трансакциите извршени на шалтерите на банките (12,5 %). За извршување на електронските плаќања, најчесто се користат мобилните апликации со 54,7 % или висок годишен раст од 19,6 %, што повторно укажува на натамошно менување на платежните навики во прилог на користењето на поудобните дигитални канали за плаќање.